Абдулазиз Камилов Афғонистон президенти вакиллари билан ўзаро алоқаларни мустаҳкамлаш масалаларини муҳокама этди

Ўзбекистон Республикаси ташқи ишлар вазири Абдулазиз Камилов Афғонистон Ислом республикаси президентининг иқтисодий масалалар бўйича катта маслаҳатчиси Ҳумоюн Қаюмий ва президентнинг Марказий Осиё давлатлари ҳамда Россия билан ҳамкорликни ривожлантириш бўйича махсус вакили Муҳаммад Шокир Коргарни қабул қилди. Бу ҳақда вазирлик матбуот хизмати хабар берди. 

Меҳмонлар Ўзбекистонга икки томонлама учрашув ва музокаралар, шунингдек, Тошкентда бўлиб ўтаётган 10-халқаро саноат ярмаркаси ва кооперация биржасида иштирок этиш учун келганди. 

Суҳбат чоғида ўзбек—афғон алоқаларини мустаҳкамлаш ва кенгайтириш ҳолати ҳамда истиқболлари, олий ва юқори даражадаги икки томонлама учрашувлар доирасида эришилган келишувларнинг амалга оширилиши муҳокама этилди. 

Учрашувда Афғонистоннинг Ўзбекистондаги элчиси Сайёд Шаҳобиддин Темурий иштирок этди.