Тошкент шаҳрининг Шайхонтоҳур тумани, Фаробий кўчасида қурилаётган уй қулашига катта эҳтимол билан бетон қопламанинг меъёрдан ортиқ босими сабаб бўлган. Бу ҳақда воқеа жойидаги ҳодиса тафсилотлари билан таниш манбалар маълум қилди, дея хабар беради «Газета.uz».
Маълумотларга кўра, ертўлага эга икки қаватли бино кўча ёқасида («Ўзбекистон» маҳалласи) бўлиб, унга савдо объектлари, иккинчи қаватига эса тренажёр залини жойлаштириш режалаштирилган.
Биринчи ва иккинчи қават ўртасидаги бетон плиталар усти қурилиш материаллари билан тўлдириб ташланган. Оғирликни кўтара олмаган плиталар ғиштли деворлар билан бирга қулаб тушган.
Ҳодиса содир бўлган вақтда бинода 11 киши бўлган. Гувоҳларнинг сўзларига кўра, тўрт киши қурбон бўлган (расман уч киши экани хабар қилинди), яна бир кишининг аҳволи оғир.
Ҳалок бўлганлар (улар орасида бино эгаси ҳам бор) ва жароҳатланганлар қутқарувчилар кучи билан бино бўлаклари остидан олинди. Айни пайтда ҳодиса жойида тозалаш ишлари олиб борилмоқда. Фаробий кўчаси транспорт воситалари ҳаракати учун очилган.
Изоҳ (0)