Испания ҳукумати раиси вазифасини бажарувчи Мариано Рахой бош вазир лавозимига қайта сайланиш учун парламент қуйи палатаси — Конгресс депутатлари қўллаб-қувватлашига ҳаракат қилишга рози бўлди. Бу ҳақда у қирол Филипп VI билан маслаҳатлашувларидан сўнг маълум қилди, дея хабар беради «ТАСС».
«Испанияга имкон борича тезроқ ҳукумат керак ва мен бу амалга ошиши учун қўлимдан келганича ҳаракат қиламан. Қирол яна бош вазирликка номзод бўлишни топширди ва мен бунга рози бўлдим. Испания охирги ойларда мамлакат тарихида мисли кўрилмаган вазиятни бошидан кечирмоқда. Ҳафта охиригача мулоқот, ўзаро ҳамфикрлилик ва ҳамкорлик ёрдамида бунга чек қўйишимизга умид қиламан ва ишонаман», — дея таъкидлади Рахой.
Испаниядаги сиёсий кучлар 300 кундан ошиқ вақтдан бери ҳукуматни шакллантириш юзасидан келишолмаяпти. Партияларда бош вазирни тасдиқлаш учун 31 октябргача муддат бор, акс ҳолда, охирги йил мобайнида учинчи ялпи сайловлар ўтказилишини эълон қилишга тўғри келади.
Изоҳ (0)