Қирғизистон президенти девони вакилларининг айтишича, 2010 йил июнидаги референдумда қабул қилинган мамлакат конституциясининг асл нусхаси мавжуд эмас. Бу ҳақда «ТАСС» хабар бермоқда.
Миллий парламент депутатлари жорий йил декабрида асосий қонунга ўзгартиш киритиш тўғрисида сўров киритди. Шу муносабат билан девонда маълум қилинишича, асосий қонунга киритилган ўзгартишлар ҳар доим президент томонидан депутатлар иштирокида имзоланган, аммо 2010 йилги конституция бундан мустасно.
«Конституциянинг ягона узил-кесил матни референдумгача ҳам, референдумдан кейин ҳам расмий шахслардан ҳеч ким томонидан имзоланмаган. 2010 йили бундай маросимсиз иш кўришга қарор қилишди», — дейилади девон хабарида.
Шу тариқа, конституциянинг тегишли шахслар томонидан имзоланган асл нусхаси бугунги кунда мавжуд эмас.
«Расман қонун бузилмаган, негаки конституция имзоланишни талаб этмайди. Амалда эса бу билан юридик жараёнларга беписандлик ҳамда сайловчиларга беҳурматлик намойиш этилган», — қўшимча қилинади ҳужжатда.
Изоҳ (0)