Австралия фуқароси Мэт Жонснинг автомобили iPhone 7 смартфонининг портлаши оқибатида ёниб кетди, деб хабар бермоқда «Hi-Tech Mail.ru».
Қурилма эгасининг маълум қилишича, у iPhone 7 ни автомобиль салони ичидаги кийимлар орасида қолдириб, сёрфинг билан шуғулланишга кетган. Қайтиб келганида эса даҳшатга тушган: унинг машинаси салонидан тутун чиқаётган эди.
Автомобиль салонининг қарийб ярми ёниб кетди. Жонс ёнғинни бартараф этганидан сўнг машинани синчиклаб текширди ва айнан iPhone 7 ёнғинга сабабчи бўлган деб ҳисоблади.
Мэт Жонснинг айтишича, у ҳеч қачон қалбаки қувватлантирувчи қурилмалардан фойдаланмаган.
Apple вакиллари ҳодисадан хабардор эканини маълум қилди ва воқеа сабабларини ўрганиш учун Жонс билан ҳамкорлик қилишга тайёр эканини билдирди.
Изоҳ (0)