«Davra.uz» ижтимоий тармоғида «Ўзбекистон Республикаси Бош вазири виртуал қабулхонаси ахборот маркази» гуруҳи очилди. Гуруҳ — фуқаролардан мурожаатларни қабул қилишнинг яна бир имконияти. Бу ҳақда «Дарё»га UzInfocom Компьютер ва ахборот технологияларини ривожлантириш ва жорий этиш маркази маълум қилди.
«Davra.uz» орқали Ўзбекистон Республикаси Бош вазирига юборилган барча мурожаатлар расмий мақомга эга.
«Davra.uz»да мурожаат юбориш қандай тартибда амалга оширилади?
«Davra.uz» орқали Бош вазирга мурожаат этиш учун электрон рақамли имзо талаб этилмайди.
«Davra.uz»да рўйхатга олинган ва ушбу гуруҳга кирган жисмоний ва юридик шахслар мурожаат юбориши мумкин. Ўзбекистон Республикаси Бош вазирига мурожаат юборишнинг бошқа усулларидан фарқли равишда, «Davra.uz» фойдаланувчилари ошкора ёки шахсий кўринишда мурожаат юбориш имкониятига эга.
Ошкора мурожаатлар бевосита гуруҳ лентасида чоп этилади ва ижтимоий тармоқнинг барча фойдаланувчилари кўриши учун очиқдир. Ошкора мурожаатнинг асосий афзаллиги бу очиқлик ва интерактивликдир — бунда Сиз ахборот марказининг ходимлари билан ошкора равишда бевосита мулоқот қилиш имкониятига эга бўласиз, бу, ўз ўрнида, мурожаатлар ижросининг янада сифатли амалга ошишига туртки бўлади. Бундан ташқари, юборилаётган мурожаатга ушбу мурожаатни қўлловчи бошқа фойдаланувчилар ҳам қўшилиши мумкин, бу, ўз навбатида, такрорий мурожаатлар миқдорининг камайишига олиб келади. Ижтимоий тармоқнинг яна бир афзаллиги — мурожаатнинг янада тушунарли бўлишини таъминловчи расм, видеони юклаш ҳамда харитада белгиларни қолдириш имкониятининг мавжудлиги.
Шахсий мурожаатларни юбориш учун фойдаланувчи «Ўзбекистон Республикаси Бош вазири виртуал қабулхонаси ахборот маркази» гуруҳи маъмурларидан бирига мурожаат юбориши мумкин. Гуруҳ маъмурлари томонидан барча қабул қилинган мурожаатлар доимий мониторинги олиб борилади, мурожаат ҳолати ўзгариши ва унинг бажарилиши тўғрисидаги маълумотлар шарҳларда чоп этилади ёки жўнатувчиларнинг ўзига шахсан юборилади.
Ўзбекистон Республикаси Бош вазирига ариза, таклиф ва шикоятларни юбориш бўйича қоида ва тавсиялар билан «Ўзбекистон Республикаси Бош вазири виртуал қабулхонаси ахборот маркази» гуруҳида танишишингиз мумкин.
Эслатиб ўтамиз, 24 сентябрдан Ўзбекистон Республикаси Бош вазирига ариза, таклиф ва шикоятларни «pm.gov.uz» сайти орқали, (0 800) 210-0000 ёки 1000 қисқа рақамларига қўнғироқ қилган ҳолда, ёки ЎзЛиДеП ҳудудий партия ташкилотларига ташриф буюриш орқали юборишингиз мумкин.
Изоҳ (0)