Россия ва Туркия «Туркия оқими» газ қувури лойиҳаси бўйича ҳукуматлараро битим имзолади. Бу ҳақда Туркия президенти Ражаб Тоййиб Эрдўғон музокаралар якунларига кўра маълум қилди, деб ёзади «РБК».
Аввалроқ «Газпром» раҳбари Алексей Миллер айтиб ўтганидек, битим Қора денгиз туби бўйлаб газ қувурининг иккита йўлагини қуришни кўзда тутади. Унинг аниқлик киритишича, ҳар бир йўлакнинг қуввати 15 миллиард 750 миллион кубометр газга тенг бўлади. Улардан бири газни бевосита Туркия бозорига етказиб бериш, иккинчиси эса Туркия ҳудудидан транзит билан Европа мамлакатларига етказиб бериш учун мўлжалланган. Ҳужжатга мувофиқ, денгиз йўлаклари 2019 йил декабригача қуриб битказилиши керак.
Эслатиб ўтамиз, Россия президенти Владимир Путин Бутунжаҳон энергетика конгрессида иштирок этиш мақсадида Истанбулга ташриф буюрди. Ташриф доирасида у Туркия президенти Ражаб Тоййиб Эрдўғон билан учрашди.
Изоҳ (0)