Анқарада икки худкуш террорчи полиция операцияси чоғида ўзини портлатиб юборди. Ҳодиса жойида портловчи қурилма тайёрлаш учун ишлатиладиган 200 килограммга яқин модда топилди. Бу ҳақда Туркия пойтахти губернатори Эржон Топажа маълум қилди, дея хабар беради «ТАСС».
«Улардан бирининг шахси аниқланди, иккинчиси аёл бўлиши мумкин. Учинчи киши ҳам бўлгани гумон қилинмоқда, уни қидириш ишлари давом этяпти. Террорчилар Диёрбакир шаҳридан келган ва қидирувда бўлган. Анқарада миналаштирилган автомобиль ёрдамида теракт уюштирмоқчи бўлган кимсалар Курдистон ишчи партияси аъзолари эканлиги тахмин қилинмоқда», — дея таъкидлади губернатор.
NTV телеканалига кўра, теракт тайёрланаётгани ҳақида маълумот олган полиция 8 октябрь, маҳаллий вақт билан 06:00 атрофида пойтахтдан 30 километр узоқликдаги Хаймана туманидаги овчилар уйини қамал қилди. Жангарилардан таслим бўлишлари талаб қилинганда улар ўзларини портлатиб юборди.
Полициячилар орасида жабрланганлар бўлмагани қайд этилмоқда.
Изоҳ (0)