Хитой 2024 йилга келиб, ишлайдиган орбитал космик станциясига эга ягона мамлакатга айланиб қолиши мумкин. Бу ҳақда Хитой аэрокосмик илмий-техника корпорацияси раиси Лэй Фаньпэй маълум қилди, деб ёзади «ТАСС».
«Хитой ўз космик станциясининг экспериментал таянч модулини тахминан 2018 йилда ‘Чанчжен-5’ оғир элтувчи ракетаси ёрдамида учирмоқчи, бир нечта қисмдан иборат 20 тоннали космик станция эса тахминан 2022 йилда учирилади», — деди Лэй.
«Халқаро космик станция 2024 йилда ўз ишини тўхтатган вақтда Хитой космик станцияси ишини давом эттирадиган ягона станцияга айланиши мумкин», — дея қўшиб қўйди у.
Корпорация раҳбари сўзларига кўра, Хитой станцияси таянч модул ва иккита лаборатория модулларидан иборат бўлади, улар туташувчи портлар билан жиҳозланган бўлиб, бу станцияга бир нечта космик кема келиб тўхташига имкон беради.
Шундан сўнг учувчили кемалар ва юк кемалари станцияга ва ортга — ерга парвозлар уюштириб, уни фойдали юклар билан таъминлайди. Космонавтлар станция бортида бир йилдан ошиқроқ қолиши мумкин.
Орбитал станциянинг хизмат муддати 10 йилга мўлжалланади, у Ердан 400 километргача масофада жойлашади.
Изоҳ (0)