Интернетда Питт ва Жолининг ажрашишига қарши петиция эълон қилинди

Change.org сайтида америкалик актёрлар Брэд Питт ва Анжелина Жолининг ажрашишига қарши петиция эълон қилинди, деб ёзади «Интерфакс».

«Узоқ йиллар давомида улар сайёранинг барча бурчакларидаги миллионлаб кишилар учун мукаммал жуфтлик намунаси бўлиб келди. Энди бутун дунё севгига бўлган ишончини йўқотиши мумкин», — дейилади петицияда.

Мурожаатга Украинанинг Запорожье шаҳрида яшовчи Константин Андреев муаллифлик қилди, у россиялик қўшиқчи Сергей Шнуровга петиция ёзиш ғоясини бергани учун миннатдорлик билдирди.

Анжелина Жоли ажрашиш учун ариза бергани ҳақида 20 сентябрь куни маълум бўлди. Актриса бунга эр-хотин ўртасидаги жиддий келишмовчиликлар, хусусан, болалар тарбияси масаласидаги зиддиятларни сабаб қилиб келтирди.

Аввалроқ Лос-Анжелес (Калифорния штати, АҚШ) полицияси актёр Брэд Питтга қарши иш очгани, у ўз болаларига нисбатан шафқатсиз муносабатда бўлишда гумон қилинаётгани хабар берилган эди.

Брэд Питт эса Анжелина Жоли билан биргаликдаги оилавий ҳаётни жиннихонага қиёслади.