Ўзбекистон Республикаси бош вазирининг биринчи ўринбосари Рустам Азимов Тошкентда ишчи ташриф билан бўлиб турган Қозоғистон бош вазирининг биринчи ўринбосари Асқар Мамин билан учрашиб, савдо-иқтисодий алоқаларни кенгайтириш юзасидан аниқ чораларни муҳокама қилди. Бу ҳақда Қозоғистон бош вазири сайтида ахборот берилган.
Музокаралар натижасида Қозоғистондан Ўзбекистонга қишлоқ хўжалиги, буғдой, ун экспортини ошириш, икки давлат ҳудуди бўйлаб ўтадиган юк оқимлари учун қулай тариф шароитлари яратиш, темир йўл транспорти хизматлари учун икки томонлама имтиёзлар, Ўзбекистондан Қозоғистонга мева-сабзавот маҳсулотлари элтадиган мунтазам контейнер поездлари қатновини йўлга қўйиш юзасидан келишувларга эришилди.
Шунингдек, Ўзбекистон ва Қозоғистоннинг минтақалараро ҳамкорлигини ривожлантириш механизмларини яратиш, қўшма савдо уйлари очиш масалалари кўриб чиқилди.
Икки давлат бозорларининг ўзаро инвестициялар учун очиш, бизнес доиралар ва иқтисодиётнинг реал сектори корхоналари ўртасида алоқаларни йўлга қўйиш зарурлигини таъкидланди.
Ўзбекистон ва Қозоғистон ўртасида савдо-иқтисодий ҳамкорликнинг асосий йўналишларини кенгайтириш бўйича баённома имзоланди.
Изоҳ (0)