МСК: Ўзбекистон Президенти сайлови кампанияси ошкоралик ва очиқлик тамойиллари асосида олиб борилмоқда

Ўзбекистон Марказий сайлов комиссияси (МСК) томонидан 23 сентябрь, жума куни маҳаллий ва чет эл ОАВ вакиллари учун Ўзбекистон Президенти сайлови бўйича кампаниянинг боришига бағишланган брифинг ўтказилди.

МСК раиси Мирзо-Улуғбек Абдусаломов сайловга тайёргарлик ишлари қонунчилик талаблари, Ўзбекистон Президенти сайловига тайёргарлик кўриш ва уни ўтказиш бўйича Асосий тадбирлар дастури асосида олиб борилаётганини қайд этди.

Сайлов кампанияси қизғин паллага кириб бормоқда, сайловда иштирок этувчи партиялар аниқланди, уларга имзо варақалари бланкалари берилди. Сиёсий партиялар Ўзбекистон Президентлигига номзодни қўллаб-қувватлаш юзасидан сайловчилар имзосини иш, хизмат, ўқиш, яшаш жойида, сайловолди тадбирларида тўплашга ҳақли.

«Ўзбекистон Республикаси Президенти сайлови тўғрисида»ги Қонунга 2015 йил 29 декабрда киритилган ўзгаришларга мувофиқ сиёсий партия томонидан тақдим этилган имзо варақалари жами сайловчилар умумий сонининг 5 фоизидан 1 фоизигача камайтирилди.

Бу 214 350 нафар сайловчи имзосини ташкил этади. Имзолар камида саккизта маъмурий-ҳудудий тузилма сайловчиларини қамраб олиши керак. Маъмурий-ҳудудий тузилмалардан бирида сиёсий партия имзолар умумий миқдорининг кўпи билан саккиз фоизини тўплаши мумкин.

Ўзбекистон Президенти сайловини ўтказувчи округ сайлов комиссиялари тузилган. Округ сайлов комиссияларининг 56,6 фоизи аввалги сайловларда амалий тажриба тўплаган жамиятнинг обрўли вакилларидир. Комиссия аъзоларининг 56 нафари, яъни 36,8 фоизи хотин-қизлар, уларнинг 12 нафари эса сайлов комиссияларининг раҳбариятидан жой эгаллаган.

Сайлов кампанияси ошкоралик ва очиқлик тамойиллари асосида олиб борилмоқда. Шу мақсадда МСКнинг Ўзбекистон миллий телерадиокомпанияси, ЎзА, «Жаҳон», «Uzreport» ахборот агентликлари, Электрон оммавий ахборот воситалари миллий ассоциацияси билан икки томонлама битимлар имзоланди. МСК томонидан хорижий ва миллий ОАВнинг қарийб 400 нафар вакили аккредитациядан ўтказилди.

МСК Европада хавфсизлик ва ҳамкорлик ташкилотининг Демократик институтлар ва инсон ҳуқуқлари бўйича бюроси, МДҲ Ижроия қўмитаси, ШҲТ, Ислом ҳамкорлик ташкилоти ва Бутунжаҳон сайлов органлари ассоциацияси каби халқаро тузилмаларга Ўзбекистон Президенти сайловида кузатувчи сифатида иштирок этиш учун таклифномалар юборган.