iPhone 7 тақдимотидан кейин Ўзбекистонда аввалги iPhone’лар 10 фоизгача арзонлашди

7 сентябрь куни тақдим этилган янги iPhone 7 ва 7 Plus  смартфонлари АҚШ ва яна ўнлаб мамлакатларда бугун, 16 сентябрдан сотувга чиқади. Шунга қарамай, янги Apple смартфонларининг тақдимотиёқ аввалги iPhone моделлари чакана нархларига ўз таъсирини ўтказди, деб ёзади «Mobinfo.uz».

Ўзбекистондаги мобил техника бозорлари сотувчилари сўзларига кўра, шу йилнинг августи билан таққослаганда, iPhone 6s ва iPhone 6s Plus, шунингдек, iPhone SE нархлари моделига ва хотира ҳажмига қараб 5 фоиздан 10 фоизгача тушди. Масалан, август бошида 16 Гб хотирали iPhone 6s қарийб 4 миллион сўмга сотилган бўлса, ҳозирда бу қурилмани 3,8 миллион сўмга топиш мумкин.

Сотувчилар iPhone 7 ва 7 Plus чакана савдода пайдо бўлиши билан нархлар янада тушишини таъкидлади, аммо бу қурилмалар Ўзбекистон бозорига октябрь бошида етиб келганидан сўнг кузатилади.

Айни пайтдаги Apple смартфонлари нархлари эса қуйидагича:

— Apple iPhone 6S (16 Гб) – 3,8 миллион сўм;

— Apple iPhone 6S (64 Гб) – 4,4 миллион сўм;

— Apple iPhone 6S (128 Гб) – 5,1 миллион сўм;

— Apple iPhone 6S Plus (16 Гб) – 4,2 миллион сўм;

— Apple iPhone 6S Plus (64 Гб) – 4,8 миллион сўм;

— Apple iPhone 6S Plus (128 Гб) – 5,3 миллион сўм;

— Apple iPhone SE (16 Гб, қора) – 2,8 миллион сўм;

— Apple iPhone SE (64 Гб, қора) – 3,3 миллион сўм.

Рўйхатда келтирилган қурилмаларни кўрсатилган нархларда сотиб олишга «Дарё» нашри кафолат бермайди. Қурилмалар ва уларнинг нархлари ҳақидаги ахборот фақат танишиш учун тақдим этилган.