Хитой 15 сентябрь куни ўзининг одам яшайдиган иккинчи космик станциясини учирди, дея хабар бермоқда «Синьхуа». Октябрда унга икки тайконавт етиб боради ва 30 кунни ўша ерда ўтказади. 2020 йилдан сўнг Хитой бир неча модулдан иборат орбитан станция қуришни режалаштирмоқда. Meduza нашри Хитойнинг космик дастури ҳақида қисқача ахборот тайёрлади.
Хитой 15 сентябрь куни «Тяньгун-2» космик станциясини учирди. «Чанчжэн-2F» ракетаси станция билан биргаликда Тошкент вақти билан 19:04 йўлга чиқди. Станциянинг узунлиги 18 метрга тенг бўлиб, у Халқаро космик станция (ХКС)даги Россиянинг ҳаётни таъминлаш модулидан каттароқ. Станция 380 километр юқорига кўтарилади, сўнг яна бироз кўтарилади. Бу Хитойнинг иккинчи космик станцияси — «Тяньгун-1» 2011 йили ишга туширилган, унга икки марта тайконавтлар чиққан. Ҳозирда у билан алоқа узилган, станция 2017 йилда орбитадан чиқиб кетади.
2016 йил октябрида «Тяньгун-2»га одамлар етиб боради. «Шэньчжоу-11» фазовий кемасида икки тайконавт станцияга боради ва у ерда 30 кун яшайди. Бу вақт давомида улар бир қатор тадқиқотлар ўтказишади, хусусан, коинотда қишлоқ хўжалиги экинларини етиштиришга уринишади ва вазнсизликнинг юрак-қон томир тизимига таъсирини ўрганишади. 2017 йилда «Тяньгун-2»га юк ташувчи космик кемани яқинлаштириш кўзда тутилган. Ушбу фазовий станциянинг миссияси икки йилга мўлжалланган.
Хитой бир неча модулдан иборат космик станция қуришни режалаштирмоқда. 2020 йилдан кейин орбитага икки илмий модулни бириктирадиган янги — «Тяньгун-3» станциясини олиб чиқиш режалаштирилган. Агар хитойликлар бунинг уддасидан чиқа олса, янги станция ХКСдан сўнг иккинчи мультимодул космик станцияга айланади.
Коинот масаласида Хитойнинг режалари улкан. Хитойлик муҳандислар ҳозирда кўп марта фойдаланиладиган «Шэньлун» фазовий аппарати устида иш олиб бормоқда. У қачон тайёр бўлиши номаълум. Шунингдек, Хитой Ойни ҳам ўрганмоқда: 2013 йили Ернинг табиий йўлдошига «Юйту» луноходи қўнган эди, 2018 йили янги луноходни Ойга қўндириш мақсад қилинган. Бундан ташқари, Хитой 2020 йилдан сўнг Ойга одам жўнатиш, 2030 йилларга бориб эса Марсдан тупроқ намунаси олиб келиш ҳақида ўйлаяпти. 2016 йилнинг 16 август куни Хитой космосга квант сунъий йўлдошни учирган эди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)