Xitoy 15-sentabr kuni o‘zining odam yashaydigan ikkinchi kosmik stansiyasini uchirdi, deya xabar bermoqda “Sinxua”. Oktabrda unga ikki taykonavt yetib boradi va 30 kunni o‘sha yerda o‘tkazadi. 2020-yildan so‘ng Xitoy bir necha moduldan iborat orbitan stansiya qurishni rejalashtirmoqda. Meduza nashri Xitoyning kosmik dasturi haqida qisqacha axborot tayyorladi.
Xitoy 15-sentabr kuni “Tyangun-2” kosmik stansiyasini uchirdi. “Chanchjen-2F” raketasi stansiya bilan birgalikda Toshkent vaqti bilan 19:04 yo‘lga chiqdi. Stansiyaning uzunligi 18 metrga teng bo‘lib, u Xalqaro kosmik stansiya (XKS)dagi Rossiyaning hayotni ta’minlash modulidan kattaroq. Stansiya 380 kilometr yuqoriga ko‘tariladi, so‘ng yana biroz ko‘tariladi. Bu Xitoyning ikkinchi kosmik stansiyasi — “Tyangun-1” 2011-yili ishga tushirilgan, unga ikki marta taykonavtlar chiqqan. Hozirda u bilan aloqa uzilgan, stansiya 2017-yilda orbitadan chiqib ketadi.
2016-yil oktabrida “Tyangun-2”ga odamlar yetib boradi. “Shenchjou-11” fazoviy kemasida ikki taykonavt stansiyaga boradi va u yerda 30 kun yashaydi. Bu vaqt davomida ular bir qator tadqiqotlar o‘tkazishadi, xususan, koinotda qishloq xo‘jaligi ekinlarini yetishtirishga urinishadi va vaznsizlikning yurak-qon tomir tizimiga ta’sirini o‘rganishadi. 2017-yilda “Tyangun-2”ga yuk tashuvchi kosmik kemani yaqinlashtirish ko‘zda tutilgan. Ushbu fazoviy stansiyaning missiyasi ikki yilga mo‘ljallangan.
Xitoy bir necha moduldan iborat kosmik stansiya qurishni rejalashtirmoqda. 2020-yildan keyin orbitaga ikki ilmiy modulni biriktiradigan yangi — “Tyangun-3” stansiyasini olib chiqish rejalashtirilgan. Agar xitoyliklar buning uddasidan chiqa olsa, yangi stansiya XKSdan so‘ng ikkinchi multimodul kosmik stansiyaga aylanadi.
Koinot masalasida Xitoyning rejalari ulkan. Xitoylik muhandislar hozirda ko‘p marta foydalaniladigan “Shenlun” fazoviy apparati ustida ish olib bormoqda. U qachon tayyor bo‘lishi noma’lum. Shuningdek, Xitoy Oyni ham o‘rganmoqda: 2013-yili Yerning tabiiy yo‘ldoshiga “Yuytu” lunoxodi qo‘ngan edi, 2018-yili yangi lunoxodni Oyga qo‘ndirish maqsad qilingan. Bundan tashqari, Xitoy 2020-yildan so‘ng Oyga odam jo‘natish, 2030-yillarga borib esa Marsdan tuproq namunasi olib kelish haqida o‘ylayapti. 2016-yilning 16-avgust kuni Xitoy kosmosga kvant sun’iy yo‘ldoshni uchirgan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)