Тошкент шаҳрида 8-сентябр куни Ўзбекистон Олий Мажлиси Қонунчилик палатаси депутатлари ва Сенати аъзолари, таклиф этилган Вазирлар Маҳкамаси аъзолари, вазирликлар ва идоралар раҳбарлари, бошқа ташкилотларнинг, оммавий ахборот воситаларининг вакиллари иштирокида Олий Мажлис Қонунчилик палатаси ва Сенатининг қўшма мажлиси бўлиб ўтди.
ЎзА ахборотига кўра, Олий Мажлис палаталарининг қўшма мажлисида «Ўзбекистон Президентининг вазифа ва ваколатларини бажаришни вақтинча юклаш тўғрисида»ги масала кўриб чиқилди.
Қўшма мажлис давомида Олий Мажлис Сенати раиси Ниғматилла Йўлдошев Ўзбекистон бош вазири Шавкат Мирзиёевнинг давлат ҳокимияти ва бошқаруви органларида раҳбарлик лавозимларидаги кўп йиллик тажрибасини, аҳоли ўртасидаги ҳурмат-эътиборини инобатга олган ҳолда, Ўзбекистон Президенти вазифа ва ваколатларини бажаришни унинг зиммасига вақтинча юклаш мақсадга мувофиқлиги тўғрисидаги таклиф билан мурожаат қилди.
Олий Мажлис Сенати раиси Ниғматилла Йўлдошевнинг мазкур таклифи Сенат Кенгаши томонидан маъқулланганлиги маълумот учун қабул қилинди.
«Сиёсий партиялар фракциялари раҳбарлари, депутатлар ва сенаторлар ҳозирги шароитда барқарорликни сақлаш, жамоат хавфсизлигини ва ҳуқуқ-тартиботни таъминлаш, мамлакатни ривожлантиришнинг энг муҳим сиёсий ва ижтимоий-иқтисодий масалаларини самарали ҳал этиш зарурлигини эътиборга олиб, Олий Мажлис Сенати раиси Ниғматилла Йўлдошевнинг таклифини қўллаб-қувватлади», — дейилади ЎзА ахборотида.
Олий Мажлис Қонунчилик палатаси ва Сенати Ўзбекистон Президентининг вазифа ва ваколатларини бажаришни бош вазир Шавкат Мирзиёев зиммасига вақтинча юклаш тўғрисида қўшма қарор қабул қилди.
Ўзбекистон Марказий сайлов комиссиясига «Ўзбекистон Республикаси Президенти сайлови тўғрисида»ги Қонунга тўлиқ мувофиқ ҳолда Ўзбекистон Президенти сайлови ўтказилишини ташкил этиш тавсия қилинди.
«Ўзбекистон Республикаси Олий Мажлиси палаталарининг қўшма мажлиси шу билан ўз ишини якунлади», — дейилади ЎзА ахборотида.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)