1 сентябрь, пайшанбага ўтар кечаси уни қўлга олмоқчи бўлган Дания полициячиларига қарата ўт очган копенгагенлик наркосавдогар ИШИД террорчилик гуруҳи аъзолари буйруғига кўра ҳаракат қилган. Бу ҳақда ИШИДга алоқадор Amaq агентлиги маълум қилди, деб ёзади «ТАСС».
«Копенгагенда полициячиларга ҳужум қилган киши ИШИД аскари бўлган ва ИШИДнинг (АҚШ раҳбарлигидаги террорчиликка қарши) коалиция мамлакатларида терактлар уюштириш ҳақидаги даъватидан сўнг ҳужумни амалга оширган», — дейилади хабарда.
Асли босниялик 25 ёшли Дания фуқароси Копенгагеннинг Христиания ярим мухтор тумани ҳудудида уни наркотиклар савдоси учун қўлга олишга уринишганида, фуқаролик кийимидаги полициячиларга тўппончадан ўқ узди. Натижада уч киши, жумладан, икки тартиб посбони яраланди, улардан бирининг аҳволи оғир.
Ўт очган шахснинг ўзи қочиб қолди, аммо шу куниёқ Амагер оролидан топилди. Ҳибсга олмоқчи бўлишганида у яна жавоб ўтини очган полициячиларни ўққа тутди ва оғир ярадор бўлиб, кейинроқ вафот этди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)