Ўзбекистон футзал терма жамоасининг испаниялик бош мураббийи Хосе Мария Мендес Жаҳон Чемпионатига бориши керак бўлган дарвозабонни жамоага ҳурматсизлиги учун рўйхатдан ўчириб ташлаганини маълум қилди.
«Championat.asia» сайти учун берган интервьюсида мутахассис Осиё Чемпионатидаги таркибга 3 та ўзгартириш киритганига изоҳ берган.
«Клим Тюгаев машғулотлардан ўз-ўзидан ғойиб бўлди ва 3—4 кундан сўнг қайтиб келиб, ҳеч кимга тушунтириш бермади. Бу мураббий ва жамоа учун ҳурматсизлик эди, шунинг учун уни рўйхатдан чиқариб юбордим», — деди Хосе Мария Мендес.
Бунга қадар футзал терма жамоаси сафида 3 та дарвозабон Колумбияга жўнаб кетиши керак эди. Улардан бири сафдан чиққач, Мендес таркибни ўйинчи Илҳом Ҳамроев билан тўлдирди.
«Тюгаевнинг ўрнига таркибдан тушиб қолган яна икки футболчи: Андрей Шлёма ёки Жамолиддин Шариповни олиб кетишимиз мумкин эди. Бироқ кам ўйнайдиган тажрибалилардан кўра, терма жамоа келажаги бўлган ёш футзалчини сафга қўшишга қарор қилдик. 20 ёшгача футзалчилар ўртасидаги қитъа чемпионатида Илҳом Ўзбекистон сардори бўлади, мундиал эса унга тажриба тўплаш имконини беради», — деб таъкидлади мураббий.
Мендес Шарипов ва Шлёмани таркибдан тушириб қолдириш қийин бўлганини айтиб, уларга жамоага бўлган муносабатлари учун миннатдорчилик билдирди.
Изоҳ (0)