Турк қўшинлари Сурия ҳудудига киргани ҳақидаги хабарлар Истанбул биржасида индекслар кескин тушиб кетишига сабаб бўлди. Инвесторлар ИШИД жангариларига қарши ҳарбий операциянинг бошланиши Туркиянинг ўзидаги хавфсизлик билан боғлиқ вазиятни ёмонлаштиришидан хавотир олган. Бу ҳақда «РБК» хабар бермоқда.
Истанбул биржасида 24 август, чоршанба куни эрталабки савдолар чоғида BIST100 индекси 2,87 фоизга тушиб кетди. Бу эса Bloomberg томонидан кузатилиб бориладиган 94 та миллий биржа индекслари орасидаги энг ёмон натижа бўлди. BIST100 Туркияда ҳарбий тўнтаришга уринишдан сўнг фавқулодда ҳолат эълон қилинган 21 июлдан бери бунчалик тушиб кетмаганди. BIST30 индекси эрталабки савдолардан бундан ҳам кўп — 2,93 фоизга пастлади.
Биржа котировкалари билан бир қаторда турк лирасининг долларга нисбатан курси ҳам пасайди: минимум ҳолатида у лира учун 33,69 сентгача тушди, бу эса кечаги савдоларга қараганда 0,525% кам.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)