Ўзбекистонда диний экстремистик мазмундаги материалларни тарқатган 2004–2006 йилларда туғилган уч нафар қиз жавобгарликка тортилди. Бу ҳақда Давлат хавфсизлик хизмати хабар берди.
Маълум қилинишича, улар Telegram’да канал яратиб, унда Ўзбекистон ҳудудида тақиқланган “Ироқ ва Шом ислом давлати” ҳамда “Туркистон ислом ҳаракати” террористик ташкилотларига тегишли аудио-видео материаллар ва даъватларни тарқатиш билан шуғулланган. Шунингдек, улар бошқа ёпиқ гуруҳларда ҳам тарғибот ишларини олиб борган.
“Мен диний атамаларни билиш мақсадида YouTube платформасига кирганман. Ўша пайтда Содиқ Самарқандийнинг маърузалари келиб чиққан. Самарқандийнинг дарсларини эшитиш мобайнида унинг таъсирига тушиб қолганман ва унинг маърузаларини муҳокама қилиш мақсадида ўртоғим билан гаплашганман. Уларнинг ўз шахсий саҳифалари бўлганлиги учун мен ҳам ўз Telegram мессенжеримда канал яратганман ва у ерга диний маърузаларни жойлаб келганман”, деган қизлардан бири.
Қолган икки қиз ҳам Ўзбекистонда тақиқланган Содиқ Самарқандий, Абдуллоҳ Зуфар маърузаларини эшитган ва ақидапарастлик ғоялари таъсирига тушиб қолган. Қизлар қилган ишидан пушаймонлигини билдирган.
Давлат хавфсизлик хизмати ва бошқа ҳуқуқни муҳофаза қилувчи органлар ҳамкорлигида ўтказилган тезкор-қидирув тадбирлари натижасида улар ушланиб, қонуний чоралар кўрилган.
“Афсуски, ақидапарастлик ғоялари билан заҳарланган бу ёшлар Суриядаги қонли жангларга қўшилиш ниятида ўзаро фикр алмашиб, ‘жиҳод’, ‘ҳижрат’ ва ‘шаҳид’ каби ёлғон шиорларни ҳаётий мақсад деб билишган. Шу билан бирга, улар Instagram тармоғи орқали ҳам шахсий профиллар яратиб, тақиқланган материалларни тарқатишган ва янада кўпроқ ёшларни тузоққа туширишга уринишган”, дейилади хабарда.
ДХХ ҳар қандай шубҳали саҳифа ёки гуруҳдан огоҳ бўлишга чақирди. Қизларга қандай жазо тайинланганига аниқлик киритилмаган.
Изоҳ (0)