Тошкент халқаро аэропортида фоҳишаликка жўнатилаётган икки қиз тўхтатиб қолинди. Бу ҳақда Самарқанд вилояти ИИБ матбуот хизмати хабар қилди.
Маълум қилинишича, Самарқанд вилоятининг Оқдарё туманида яшовчи 41 ҳамда 31 ёшдаги икки шахс ўзаро жиноий гуруҳ тузиб, моддий жиҳатдан қийналган ёш қизларни мўмай даромад топишига ишонтириб, ғаразли ниятларда фоҳишалик қилиши учун Ҳиндистонга жўнатаётгани тўғрисида маълумот олинган.
Улар ўша давлатда бўлган жиноий шериклари ёрдамида 23 ҳамда 25 ёшли қизларни шаҳвоний эксплуатация қилишни мақсад қилиб, кузатаётган вақтида ИИБ ва ДХХ ходимлари томонидан ўтказилган тезкор тадбир давомида қўлга олинган.
Ҳолат юзасидан Самарқанд вилояти Ички ишлар бошқармаси ҳузуридаги Тергов бошқармаси томонидан Жиноят кодексининг 135-моддаси (одам савдоси) иккинчи қисми билан жиноят иши қўзғатилиб, тергов ҳаракатлари олиб борилмоқда.
Ушбу моддага кўра, одам савдоси икки ва ундан ортиқ шахсга нисбатан, фоҳишалик билан шуғулланишга жалб этиш мақсадида содир этилган бўлса 5 йилдан 10 йилгача озодликдан маҳрум қилиш билан жазоланади.
Май ойида Тошкент вилоятида 22 ёшли қизни Россияга фоҳишалик учун олиб кетаётган аёл қўлга олинганди. Шу мақсадда 33 ёшли аёлни Москвага жўнатаётган шахс ҳам ушланганди.
Изоҳ (0)