Миллиардер Дональд Трампга қарашли АҚШдаги компаниялар умумий ҳисобда камида 650 миллион доллар қарздорликка эга. Бу ҳақда The New York Times газетасининг электрон кўринишида 20 август, шанба куни эълон қилинган мақолада маълум қилинди, деб хабар беради «ТАСС».
«Сайловолди кампанияси чоғида Республикачилар партиясидан президентликка номзод Дональд Трамп ўзини миллиардлаб доллар ишлаб топган ва ҳеч кимнинг олдида мажбурияти бўлмаган тадбиркор сифатида кўрсатишга ҳаракат қилди. Бироқ The New York Times томонидан Трампнинг АҚШдаги кўчмас мулки билан боғлиқ молиявий ҳолатлар ўрганилиши унга тегишли компаниялар камида 650 миллион доллар қарздорликка эга эканлигини кўрсатди. Бу рақамлар у президентлик пойгаси чоғида эълон қилган ҳужжатлардагидан кўра икки баробар кўп», — дейилади мақолада.
Мақолада, шунингдек, Трампнинг компаниялари хорижий молиявий институтлар, жумладан, Хитой банкидан кредитлар олгани даъво қилинмоқда. Нашр миллиардер олдинроқ ўзининг асосий рақиби Ҳиллари Клинтонни турмуш ўртоғи Билл Клинтон томонидан асос солинган хайрия жамғармаси чет эллик ҳомийлардан эҳсон қабул қилгани учун аёвсиз танқид этганини эслатиб ўтди.
Изоҳ (0)