«Пакана» лақабли наркобароннинг ўғли Мексикада одам ўғирлаш қурбонига айланган бўлиши мумкин

Айни пайтда ҳибсда сақланаётган мексикалик наркобарон Хоакин Гусманнинг ўғли аввалроқ Мексиканинг Пуэрто-Вальяртадаги ресторандан ўғирлаб кетилган кишилар орасида бўлиши мумкин, деб ёзади «Интерфакс» маҳаллий ҳукуматга таяниб.

Ўғирланганларнинг баъзилари қалбаки ҳужжатлардан фойдаланган, бу уларнинг шахсини аниқлаш жараёнини сезиларли тарзда қийинлаштиради.

Ҳужум маҳаллий «жиноий гуруҳ» томонидан амалга оширилгани айтилмоқда, аммо унинг номи маълум қилинмади.

Нашр эслатишича, аввалроқ етти нафар қуролланган шахс Пуэрто-Вальярта шаҳридаги ресторанга бостириб кириб, олти кишини асирга олган эди.

Мексиканинг «Синалоа» наркокартели етакчиси, «Эл Чапо» («Пакана») лақабли Хоакин Гусман қочганидан кейин январь ойида қайта қўлга олинган эди.