БМТ Яман ва бешта Африка мамлакатидаги гуманитар операцияларни молиялаштириш учун Фавқулодда вазиятларга шошилинч жавоб кўрсатиш фондидан қўшимча 50 миллион доллар ажратди. Тегишли қарорни БМТ бош котибининг гуманитар масалалар бўйича ўринбосари Стивен O’Брайен қабул қилди, деб ёзади «ТАСС».
Маблағнинг катта қисми — 35 миллион долларга яқини қуролли низолар давом этиб, сиёсий беқарорлик, озиқ-овқат инқирозлари ва касалликлар авжи ҳукм сураётган марказий Африкага йўналтирилади. Пуллар Конго Демократик Республикаси, Чад, Марказий Африка Республикаси ва Руанда ўртасида тақсимланади.
13 миллион доллар Ямандаги операцияларни фаоллаштиришга сарфланади, у ерда 21 миллиондан зиёд киши, яъни мамлакат аҳолисининг 80 фоизи гуманитар ёрдамга эҳтиёжманддир. Яна 2 миллион доллар Эритреядаги қурғоқчилик оқибатларини бартараф этиш, шунингдек, соғлиқни сақлаш ва сув таъминоти билан боғлиқ вазиятни яхшилашга ишлатилади.
Изоҳ (0)