ОАВ: Google компанияси Android ўрнини босадиган янги операцион тизимни тайёрламоқда

Google корпорацияси мобил қурилмалар учун янги операцион тизимни ишлаб чиқмоқда, деб ёзади «ТАСС».

The Next Web нашри ёзишича, Google ҳозирча янги тизим ҳақида расман эълон қилгани йўқ, аммо лойиҳа ҳақидаги маълумотни GitHub ишлаб чиқувчилар порталига жойлади.

Fuchsia номли янги операцион тизим келажакда Android ва Chrome операцион тизимлари ўрнини босади. Google’нинг аввалги тизимлари учун асос бўлган Linux ядроси ўрнига, Fuchsia’да Magenta ядроси қўлланилади.

Натижада Fuchsia маҳсулдорлик бўйича «буюмлар интернети»га мўлжалланган FreeRTOS ва ThreadX операцион тизимлари билан рақобатчилик қила олади. Шу тариқа, Google компьютер ва мобил қурилмаларнинг OnHub ва Google Home уй экотизимлари билан интеграциясини кучайтирмоқчи.