Россиянинг Воронеж вилояти Новохопёрский тумани Троицкое қишлоғининг 30 ёшли фуқароси кейинчалик арзонроққа сотиб олиш мақсадида қўшни иморатга ўт қўйишга урингани учун, унга қарши жиноят иши қўзғатилди, дея хабар бермоқда TJournal ИИВнинг вилоят бўйича бош бошқармасига таяниб.
Ҳодиса 6 май куни кечқурун содир бўлди. Тергов маълумотларига кўра, эркак алкоголь мастлик ҳолатида бўлган ва ўз уйига қўшни бинони, уни кейинчалик пасайтирилган нархда сотиб олиб, ўз ҳовли-жойини кенгайтириш мақсадида ёқиб юборишга қарор қилган.
Одам яшамайдиган уйга айбланувчи ойнани синдириб кирган, ёғоч полга ўзи билан олиб келган мотор мойидан қуйиб, полиция маълумотларига кўра, сигарета, гугурт ва скотчдан «қўлбола ёндирувчи қурилма ясаган». Аммо қурилма иш бермади ва полнинг бир жойи куйиб тешилди, холос.
Полиция жиноят содир этилган вазиятни августдагина текшириб тугатди. Эркакка нисбатан «жиноятга тайёргарлик кўриш ва жиноятни амалга оширишга уриниш» ҳамда «бировнинг мулкини қасддан йўқ қилиш ёки зарар етказиш» моддалари бўйича жиноят иши қўзғатилди.
Изоҳ (0)