Аргентиналик федерал судья Даниэль Рафекас собиқ президент Кристина Фернандес де Киршнерга қарши очилган ишни қайта кўриб чиқишдан бош тортди. Прокурор Альберто Нисман уни 1994 йили пойтахт Буэнос-Айресда содир этилган терактни ўрганишга халақит беришда айблаганди, дея хабар беради «ТАСС».
2015 йил январида Нисман Киршнер ва собиқ ташқи ишлар вазири Эктор Тимерманни 85 кишининг ҳаётига зомин бўлган Буэнос-Айресдаги яҳудийлар маданий марказида содир этилган терактни ўрганишга тўсқинликда айблади. Унинг таъкидлашича, ҳукумат Эрон билан нефть эвазига дон етказиб бериш юзасидан музокаралар олиб борган. Прокурорга кўра, келишув шартларидан бири терактга алоқадорликда гумон қилиниб, Аргентина томонидан қидирилаётган беш нафар эронликнинг жавобгарликдан озод этилиши бўлган.
Нисман ўз далил-исботларини Конгрессда тақдим этишидан бир сутка олдин ўз квартирасида ўлик ҳолда топилди. Унинг ўлими сабабларини ўрганиш ҳозиргача давом этмоқда.
Изоҳ (0)