Universal Mobile Systems МЧЖ уяли алоқа хизматлари кўрсатиш учун 2029 йилга қадар амал қиладиган лицензияга мувофиқ ўз фаолиятини давом эттиришини маълум қилди. Бу ҳақда «Газета.uz» хабар бермоқда.
«Компания мобил оператор сифатида барча хизмат ва сервисларни кўрсатмоқда, янги абонентларни тармоққа улашни ва амалдаги мижозларга хизмат кўрсатишни амалга оширмоқда», — дейилади оператор сайтида жойлаштирилган хабарномада.
«Жиддий салоҳиятга эга бўлган UMS барча йўналишлардаги ривожланишнинг узоқ истиқболли стратегияси реализациясини давом эттиради, бунда барча мижозларининг эҳтиёжларини қондиришга алоҳида эътибор қаратади», — таъкидланади хабарномада.
4 август, пайшанба куни Россия матбуотида “МТС” компанияси август ойининг охирига қадар UMS муассислари қаторидан чиқиши мумкинлиги хабар қилинган эди. Ушбу ахборот расмий тасдиққа эга эмас эди.
UMS 2014 йилнинг 1 декабрида Ўзбекистон ҳудудида мобил алоқа тармоғи тижорий эксплуатациясини йўлга қўйган эди. 2016 йил бошидаги ҳолатга кўра компания абонентлари сони 1,095 миллион фойдаланувчини ташкил этди.
Изоҳ (0)