Нижний Новгород (Россия) шаҳри яқинидаги Балахнин тумани ҳудудида 22—24 июль кунлари очиқ осмон остида бўлиб ўтган Alfa Future people электрон мусиқа ва технологиялар фестивалида яшин уриши туфайли бир киши ҳалок бўлди, икки киши касалхонага ётқизилди. Бу ҳақда ФВВ минтақа бошқармаси матбуот хизмати маълум қилди, дея хабар беради «ТАСС».
«Ҳодиса ҳақида 24 июль, якшанба куни маҳаллий вақт билан 16:45 да хабар берилди. Яшин туфайли бир эркак ҳалок бўлди, икки қиз касалхонага ётқизилди», — дея таъкидлади матбуот хизмати.
Фестиваль ташкилий қўмитасига кўра, бахтсиз ҳодиса тадбир якунланганидан сўнг, меҳмонлар тарқалган ва майдонда асосан хизмат кўрсатувчилар қолган, кемпинглар эса деярли бўшаган пайт содир бўлди. «Бирданига қисқа муддатли момақалдироқ аралаш кучли жала ёпирилди. Даланинг очиқ ҳудудида кетаётган эркакни чақмоқ урди. Бу ердан 50 метр нарида навбатчилик қилаётган шифокорлар уни қутқариб қололмади», — дея маълум қилди қўмита вакиллари.
Изоҳ (0)