14 июль куни Ниццадаги терактни тайёрлашга алоқадорликда гумонланиб аввалроқ Францияда қўлга олинган беш кишига нисбатан айблов эълон қилинди. Бу ҳақда Париж прокуратураси маълумотига таяниб, 22 июль, жума куни AFP маълум қилди, дея хабар бермоқда «ТАСС».
21 июль, пайшанба куни Париж прокурори Франсуа Моленс Ниццадаги террорчининг шериклари бўлиши мумкин бўлган беш кишининг ҳибсга олинганлигини тасдиқлади. Улар уч нафар тунислик эркак ва албаниялик жуфтликдир.
Моленснинг аниқлик киритишича, уч нафар гумонланувчи — А.Рамзи, С.Шукри ва Ж.Муҳаммад Валид номли эркаклар Тунис фуқароларидир. Террорчи Муҳаммад Бухлел ҳам тунислик эди. Уларга нисбатан «террорчилик мотиви бўйича олдиндан тил бириктириш орқали қотилликларга бош қўшиш» моддаси бўйича айблов эълон қилинди.
Ҳибсга олинган албаниялик жуфтлик Х.Артан ва З.Энкележа Ниццадаги террорчини қурол билан таъминлашда гумон қилинмоқда. А.Рамзи ва албаниялик жуфтлик ноқонуний қурол айланмасида айбланмоқда.
Эслатиб ўтамиз, Ницца касалхоналарида шаҳарда 14 июль куни рўй берган теракт оқибатида 84 киши ҳалок бўлди.
Изоҳ (0)