Муниса Ризаева сирли ошиғи ҳақида маълумот берди

Хонанда Муниса Ризаева «Ҳордиқ» газетасига берган интервьюсида сирли ошиғи ва ўзи ҳақидаги турли миш-мишларга ойдинлик киритди, шунингдек, унга отилган туҳмат тошларига ҳам тўхталиб ўтди. Бу ҳақда «Даракчи.uz» хабар берди.

Қўшиқчининг сўзларига кўра, унга ҳар куни гул жўнатадиган сирли ошиғи бу ерлик эмас. «У менга уйланиш ҳаракатида юрибди. Мен кузда ўттиз ёшга кираман ва бу ёшгача жуда кўп хатолар қилдим. Энди яна шу хатоларни такрорламоқчи эмасман. Айтишади-ку, оғзи куйган қатиқни ҳам пуфлаб ичади, деб. Минг марта ўйлаб, кейин жавобимни айтмоқчиман. Теннисчи йигит билан бўладиган никоҳ тўйимни интизорлик билан кутгандим, аммо унинг хиёнат қилганидан хабар топдим. Бу хиёнатни кечириш менга жуда оғир бўлди. Бизнинг бугун бирга эмаслигимизнинг бошқа сабаблари ҳам мавжуд», — деди хонанда.

Муниса Ризавея айнан шу борада турли туҳматлар қурбонига айланганини таъкидлади. «Туҳматлардан, ҳаётим ҳақида тўқилган эртаклардан жуда чарчадим. Ўзим ҳақимда салбий фикрларни эшитавериб, танқидни кўтара олмайдиган бўлиб қолдим... Мен турмушга чиқмоқчи бўлган йигит бошқасига уйлангани учун Қирғизистонга бориб, жанжал қилиб келганмишман. Аслида, воқеа бутунлай бошқача бўлганди. Оиламиз дўстининг ўғли менга уйланиш ҳаракатида эди. Бир муддат гаплашганимиздан кейин бир-биримизга мос эмаслигимизни тушундик ва яхшиликча хайрлашдик. Унинг отаси касалликдан вафот этгани туфайли таъзия билдириш учун оиламиз билан Қирғизистонга боргандик. Менга уйланмоқчи бўлган йигитнинг рафиқаси билан ҳам яхши танишман, улар жуда бахтли ҳаёт кечиришмоқда. Дўстона алоқалар сақланиб қолган бўлишига қарамасдан, мухлислар мени оиласи билан уришиб келганликда айблашибди», — дея сўзлаб берди.

Хонанда у ҳақида «жуда европалашган», «динини ҳам билмайдиган» қиз деб ўйлайдиганлар янглишишини айтди. «Аслида, мен ўзбеклигимни ҳеч қачон унутмайман! Ноҳақ айбловлардан кўнглим қолиб кетди, баъзан тушкунликка тушиб, ижод қилгим келмай қолади. Мен шунақа одамманки, оқни оқ дейман, қорани қора! Қайси санъаткор қиз йигити борлигини ошкор қилганди? Мен ҳеч кимдан ҳеч нарса беркитмадим-ку! Важа билан ажрашдим, мен ўзимдан фаришта ясамайман. Бу менга керакмас. Мухлисларим мени боримча қабул қилишларини истайман. Исм ҳам инсон тақдирини белгилар экан. Исмим таржима қилинганда ‘ишончли дўст’ деган маънони англатади. Мен инсонларга ҳақиқий дўстман!» — деди Муниса Ризаева.