Актриса ва хонанда Ситора Фармонова «Ўзбекнаво» эстрада бирлашмаси томонидан 19 июль куни концерт-томоша фаолияти билан шуғулланиш ҳуқуқини берувчи лицензиясидан маҳрум этилди. Бирлашма вакилининг маълум қилишича, Фармонова хорижга чиқиш тартиб-қоидаларини бузгани учун, лицензиясидан маҳрум этилган.
Айни вақтда, 2015 йилдан бери Бишкекнинг «Азия Микс» жамоаси таркибида Россияда ташкил этиладиган КВН мусобақаларида қатнашиб келаётган Ситора Фармонованинг «Овозли КиВиН—2016» фестивалидаги сўнгги чиқиши ижтимоий тармоқларда турли муҳокамаларга сабаб бўлаётган эди.
«Sayyod.com»нинг ёзишича, ижтимоий тармоқларнинг баъзи фойдаланувчилари актриса ўз чиқиши давомида Ўзбекистонни мазах қилган, деб ҳисоблаб, эътирозлар билдирмоқда.
«Мен Қирғизистон номидан чиқиш қилганим йўқ. ‘Азия Микс’ иштирокчилари бутун Осиёдан — Тожикистон, Қирғизистон, Қозоғистон ва ҳоказо мамлакатлардан йиғилган гуруҳ. Мен Ўзбекистон номидан қатнашаман ва дастлабки чиқишларимиз вақтида мени: ‘Ўзбекистонлик актриса Ситора Фармонова’, деб таништиришар эди. Гуруҳ Қирғизистонда тузилгани, штаби ўша ерда бўлгани учунгина уни «Бишкек, Қирғизистон», деб чақиришади», — деди актриса.
«Ўзбекистоннинг устидан кулингани йўқ. Менинг чиқишимда шундай гап бор эди: ‘Калининград менга ёқди, айниқса, шаҳарнинг маркази. У менга Тошкентга эслатди, жуда ҳам чиройли Калининград!’. Бу Ўзбекистоннинг устидан кулиш эмас, аксинча, бу ўринда шаҳарнинг чиройли қисми менга Тошкентни ёдга солгани айтилган. У ерда жуда кўп ўзбекларни, юртдошларимни учратдим, ўзимни худди Ўзбекистонда юргандек ҳис қилдим», — деди Ситора Фармонова.
«Лицензиямнинг муддати эса тугаган. Ўзбекистонга энди келдим ва, Худо хоҳласа, яна лицензия оламан. Лицензия бир йил муддатга берилади ва менинг лицензиям муддатидан аввал тугатилганидан хабарим йўқ. Шунчаки, лицензиям муддати тугаганини биламан», — дея қўшимча қилди актриса ва хонанда Ситора Фармонова.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)