Хонанда Аҳрор Усмонов 10 кун комада ётгани ҳақидаги хабарларни рад этди

Хонанда Алижон Исоқовнинг машинаси иштирокида юз берган йўл-транспорт ҳодисасидан сўнг, автомобиль ичида бўлган бошқа бир хонанда — Аҳрор Усмонов оғир аҳволда экани ҳақида таниқли сўз устаси Обид Асомов Instagram’даги саҳифаси орқали хабар қолдирган эди.

Бундан ташқари, бир қатор хорижий оммавий ахборот воситаларида Аҳрор Усмоновнинг аҳволи ҳақиқатан ҳам оғирлиги, у 10 кун давомида ҳушсиз (комада) ётгани ҳақида хабарлар пайдо бўлди. Журналист Феруз Муҳаммад бу гап-сўзларга аниқлик киритиш мақсадида Аҳрор Усмонов билан суҳбат уюштирди.

— Соғлиғингиз ёмонлашгани, автоҳалокат натижасида комага тушиб қолганингиз ҳақида гап-сўзлар юрмоқда. Бу гап-сўзлар қанчалик ҳақиқатга яқин?— Автоҳалокатдан сўнг Ғазалкентдаги шифохонага олиб боришганида комада бўлган эканман, шундан кейин Тошкентдаги 16-шаҳар касалхонаси шошилинч бўлимига олиб келишган. Ҳозирда ТошМИ шифохонасидаман. Худога шукр, аҳволим яхши, анча тузалиб қолдим.

— Чет эл оммавий ахборот воситаларидан бирида сиз ўн кундан буён комада ётганингиз ҳақида хабар чиқди. Автоҳалокатдан сўнг ҳушингизга келишингиз учун 10 кун вақт кетдими?— Авариядан сўнг 2 кунча, Ғазалкентдаги шифохонага олиб келишганидан бошлаб у ердан кетгунимча комада бўлганман. Шифокорлар 16-шаҳар шифохонасининг шошилинч бўлимида ҳушимга келтиришди.

— Ҳозир аҳволингиз қай даражада?— Аҳволим яхши. Ҳалокатда чап қўлим синган эди, бу қўлимга темир қўйишган. Ўнг қўлим авария бўлган вақтда ташқарида қолиб кетган, уни 1—2 кун ичида енгил операция қилиб, қўлимда қолиб кетган тош ва тупроқ бўлакларидан тозалаймиз, дейишди.

— Автоҳалокат вақтида сиз турмуш ўртоғингизни ёнида бўлган экансиз. Хонанда Алижон Исоқов ҳайдовчи ўриндиғининг орқасида бўлганлиги сабабли автоҳалокат нимадан, қандай нотўғри ҳаракатдан келиб чиққанини айтиб бера олмади. Бу ҳодиса қандай содир бўлди?— Турмуш ўртоғим машинани яхши бошқараётган эди. «Менинг она юртим Фарғона» деган қўшиқ ёзган эдим, ушбу қўшиқни эшитиб, гап-сўз билан чалғиб, тезлик ошиб кетганини ҳам сезмай қолдик. Бундай қарасам йўлнинг чеккасига чиқиб кетаётгандек туюлди. «Аяси, тезликни секинлат, секинлат», дейишга улгурдим холос, рулни бошқара олмай қолди ва шу авария содир бўлди.

— Турмуш ўртоғингизни аҳволлари қандай?— Худога шукр, у ҳозир уйда. Авария оқибатида оёғи сингани учун травматология бўлимида даволаниб чиқди.

— Шифокорлар сизга қачон жавоб беришади?— Шифокорлар роса қўллаб-қувватлашмоқда. Ёшингиз 18—20 атрофида бўлса, тезда тузалиб, оёққа туриб кетар экансиз. Ҳозирги аҳволимни ҳисобга олсам, ҳали-бери шу ерда бўлсам керак. Кундан кунга соғлиғим яхши томонга ўзгармоқда. Худо хоҳласа, тез кунларда кўрмагандек бўлиб кетаман.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.