Россия олимпия қўмитаси Спорт арбитраж судининг (CAS) қарори юзасидан расмий баёнот берди. Бу ҳақда «Спорт Экспресс» хабар қилмоқда.
Баёнотда таъкидланишича, ушбу қарор билан «тоза» футболчиларнинг ҳуқуқларини поймол қилувчи хавфли прецедент яратилди.
«Энди спорт олами янги қонунларга кўра яшайди», — дейилади ҳужжатда.
Шунингдек, Россия олимпия қўмитаси Халқаро олимпия қўмитасини допинг жанжалига алоқадор бўлмаган россиялик спортчиларнинг Олимпиадада иштирок этиши юзасидан холис қарор қабул қилишга чақирди. Эслатиб ўтамиз, бу борадаги қарор 24 июль куни эълон қилинади.
Бугун, 21 июль куни CAS Россия Олимпия қўмитасининг ва 68 нафар россиялик енгил атлетнинг апелляциясини рад этди. Улар Халқаро енгил атлетика федерациялари уюшмасининг (IAAF) россиялик спортчиларнинг Олимпия ўйинларида иштирок этишига қўйган тақиқини қайта кўриб чиқишни сўраган эди. Шу тариқа, россиялик енгил атлетлар Рио-де-Жанейродаги Олимпия ўйинларида иштирок этмайдиган бўлди. Фақатгина Дарья Клишина ва Юлия Степанова бундан мустасно — IAAF илгарироқ уларнинг иштирокига рухсат берган эди.
Изоҳ (0)