«Дарё» интернет-нашри шу йилнинг 10 сентябрь — 1 октябрь кунлари Колумбияда бўлиб ўтадиган футзал бўйича жаҳон чемпионати иштирокчиларини навбатма-навбат таништириб бормоқда. Бунгача мезбонлар ҳамда Португалия терма жамоалари ҳақида маълумот берилган эди, бугун эса Ўзбекистоннинг мусобақа гуруҳ босқичидаги яна бир рақиби — Панама ҳақида.
Қандай қилиб ЖЧ—2016 иштирокчисига айланган?
2016 йилнинг май ойида Коста-Рикада футзал бўйича Шимолий Америка (КОНКАКАФ) чемпионати — Колумбияда бўладиган жаҳон чемпионатининг саралаш баҳслари бўлиб ўтди. Саккиз жамоа иштирок этган мусобақанинг икки гуруҳдан иборат гуруҳ босқичи якунига етиши биланоқ ЖЧ—2016 иштирокчилари маълум бўлди: Гватемалани 4:1, Гондурасни 10:3, Мексикани эса 4:3 ҳисобида мағлуб этган панамаликлар ўз тарихида иккинчи марта жаҳон чемпионати иштирокчисига айланди.Қайд этиш жоиз, Панама мусобақадан мусобақага КОНКАКАФ чемпионатидаги натижаларини яхшилаб бормоқда. 2004 йилги минтақавий мусобақада 5-ўринни эгаллаган панамаликлар, 2008 йили тўртинчи, 2012 йили учинчи ва ниҳоят, 2016 йилги биринчиликда иккинчи ўринни эгаллади. Сўнгги чемпионатда Августин Кампузано шогирдлари ярим финалда Кубани қўшимча вақтларда 6:5 ҳисобида мағлуб этган бўлса-да, финалда мусобақа мезбони Коста-Рикага йирик — 0:4 ҳисобида таслим бўлди.
Кучли томонлари
Панама футзалининг халқаро майдонлардаги муваффақиятли иштироки, аввало, терма жамоа бош мураббийи Августин Кампузано номи билан боғлиқ. Куба футзал терма жамоаси мураббийлари штаби таркибида Испанияда ўтган 1996 йилги, Гватемалада ташкил этилган 2000 йилги ва Хитой Тайпейи мезбонлик қилган 2004 йилги жаҳон чемпионатларида қатнашган мураббийнинг бош мураббий этиб тайинланиши Панама футзал термасини бутунлай ўзгартириб юборди.
Тўрт йил аввал Панама терма жамоасини илк бор жаҳон чемпионати сари етаклаб бориб, Клаудио Гудриж ва Фернандо Мена каби ўйинчиларни ҳақиқий қаҳрамон ва юлдузга айлантирган мураббий бу сафар янада яхшироқ натижаларга эришишдан умидвор. Сўнгги КОНКАКАФ чемпионатида мусобақанинг энг яхши дарвозабони дея тан олинган Даниэл Атенсио эса ҳозирги Панаманинг энг кучли нуқтаси ҳисобланади.
Жаҳон чемпионатларидаги иштироки ҳақида
Панама, юқорида таъкидланганидек, жаҳон чемпионатларидаги дебютини бундан тўрт йил аввал Таиланд залларида ўтказган ва Колумбиядаги мундиал улар учун иккинчи жаҳон чемпионати ҳисобланади.Умуман олганда, Кампузано шогирдлари Таиландда ёмон натижа қайд этмаган, ҳатто омадли иштирок этган, дейиш мумкин. Мусобақа гуруҳ босқичи 1-турида Марокашни 8:3 ҳисобида мағлуб этган дебютантларнинг Европа гиганти Испания (3:8), Осиё гранди Эронга (3:4) қарши бирор чора топа олиши, албатта, амри маҳол эди.
Нимчорак финалда эса Бразилия рақиб бўлган — нафақат ўзининг, балки Озарбайжон, Қозоғистон ва Россия каби миллий терма жамоаларни ҳам ўйинчилар билан таъминлаб бераётган ва охир-оқибат 2012 йилги жаҳон чемпионига айланган юрт вакиллари Панамага «атиги» 16 та гол урганига ҳайрон қолмаса ҳам бўлади.
2016 йилги жаҳон чемпионатини Панама айнан Ўзбекистонга қарши ўйин билан бошлайди. Учрашув 10 сентябрь куни Кали шаҳридаги «Халқ колизейи»да бўлиб ўтади.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)