АҚШ Россиянинг Бразилиядаги Олимпиадада иштирок этиши бўйича ўз позициясига эга эмас, бу борадаги қарорларни ихтисослашган спорт тузилмалари қабул қилади. Бу ҳақда Оқ уй матбуот котиби Жош Эрнест маълум қилди, деб ёзади «ТАСС».
«АҚШ Россиянинг Олимпиада ўйинларидаги иштироки борасида маълум позицияга эга эмас. Бундай қарорлар Халқаро олимия қўмитаси ва муайян мусобақалар учун масъул бўлган тегишли назорат тузилмалари томонидан қабул қилинади», — деди у.
Шу билан бирга, Оқ уй вакили ушбу тузилмалар «Бутунжаҳон аксилдопинг агентлиги (WADA) маърузасига жавобан иш тутишини» таъкидлади. «Бу АҚШ ҳукумати бўлинмаси бўлмаган мустақил орган», — дея қўшимча қилди у.
18 июль куни WADA мустақил комиссиясининг 2014 йилги Сочи Олимпиадасида йўл қўйилган допинг қаллобликлари юзасидан якуний ҳисоботи эълон қилинди. Унда, жумладан, қаллобликларга Россиянинг кўпгина йирик давлат мансабдорлари алоқадорлиги айтилди. Шу муносабат билан Халқаро олимпия қўмитасининг шошилинч йиғилиши ўтказилди. Халқаро олимпия қўмитаси ижроия қўмитасининг 19 июль куни ўтказилган телефон конференцияси якунларига кўра Россияга ишончсизлик билдириш ва мамлакатда халқаро мусобақаларнинг ташкил этилишини қўллаб-қувватламаслик қарори қабул қилинди.
Изоҳ (0)