Сентябрь ойида футзал бўйича Колумбияда бўлиб ўтадиган Жаҳон чемпионатида иштирок этадиган Ўзбекистон терма жамоаси август ойида Қозоғистон ва Эрон термаларига қарши ўртоқлик ўйинлари ўтказади. Бу ҳақда «Championat.asia» хабар бермоқда.
Хосе Мария Мендез бошчилигидаги Ўзбекистон терма жамоаси август ойи бошида Қозоғистон билан иккита ўртоқлик учрашуви ўтказади. Қозоғистон терма жамоаси ҳам Колумбиядаги мундиалда иштирок этади. Улар Коста-Рика, Аргентина, Соломон ороллари билан бир гуруҳдан ўрин олган.
Бундан ташқари, ўзбекистонлик футзалчилар август ойи охирида Осиёнинг 11 карра чемпиони Эрон терма жамоаси билан ўртоқлик учрашуви ўтказишни режалаштиришган. Форслар февраль ойида Тошкентда ўтган Осиё чемпионати финалида Ўзбекистон терма жамоасини мағлуб этганди.
Эрон Жаҳон чемипонатида Испания, Марокаш ва Озарбайжон билан бир гуруҳдан жой олган.
Ўзбекистон терма жамоаси эса Колумбиядаги мундиалда «А» гуруҳида мезбон Колумбия, Португалия ва Панама терма жамоаларига қарши ўйнайди.
Колумбиядаги Жаҳон чемпионати 10 сентябрь куни бошланади.
Изоҳ (0)