ИШИД террорчилик ташкилоти Ниццадаги қонли ҳужум юзасидан жавобгарликни ўз бўйнига олди. Бу ҳақда Франция ОАВларидаги тасдиқланмаган маълумотларга таяниб, Британиянинг The Daily Mail газетаси маълум қилди, деб ёзади «ТАСС».
Оммавий қурбонларни келтириб чиқарган ҳужум 14 июль, пайшанба куни кечки пайт Ниццадаги Инглиз қирғоғида содир бўлди, у ерда ўша вақтда Франция Миллий байрами шарафига отилган мушакларни томоша қилаётган минглаб кишилар бўлган. Маълумотларга кўра, оломон ичига юк машинаси бор тезлиги билан бостириб кирган, натижада 77 киши ҳалок бўлган, юзлаб кишилар жароҳат олган.
The Daily Mail маълум қилишича, юк машинаси ҳайдовчиси «Оллоҳу акбар» дея хитоб қилган. Ҳодиса ҳозирча теракт сифатида баҳолангани йўқ, текшириш ишлари олиб борилмоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)