АҚШ Конгресси 2001 йил 11 сентябрдаги терактлар бўйича махсус комиссия ҳисоботининг аввал чоп этилмаган қисмини эълон қилишга ҳозирлик кўрмоқда. Бу ҳақда CNN маълумотларига таяниб, «ТАСС» хабар берди.
Телекомпания манбаларига кўра, узоқ вақт мобайнида махфий бўлган ва Саудия Арабистони раҳбариятининг 11 сентябрда самолётларни қўлга олган шахслар билан эҳтимолий алоқадорлигига оид ҳужжатлар 15 июль, жума куни эълон қилиниши мумкин. Бундан аввал уларни АҚШ Давлат департаменти ва разведка идоралари ходимлари кўриб чиққан ҳамда «жузъий таҳрир» билан чоп этилишига розилик билдирган.
Мазкур материаллар дунё юзини кўришини Конгресснинг айрим аъзолари қўллаб-қувватлади. Уларнинг чоп этилиш эҳтимоли Вашингтонда қизғин баҳсларга сабаб бўлди ва АҚШ ҳамда Саудия Арабистони муносабатларига соя солди. ОАВ ҳужжатларда Саудия расмийларининг «Ал-Қоида» террорчилик тармоғи билан алоқалари ҳақидаги маълумотлар ўрин олган бўлиши мумкинлигини билдирмоқда.
Изоҳ (0)