Ўзбекистон Республикаси Ахборот технологиялари ва коммуникацияларини ривожлантириш вазирлиги янги таҳрирдаги Мобил алоқа хизматларини кўрсатиш қоидалари лойиҳасини муҳокама учун эълон қилди, дея хабар бермоқда «Газета.uz».
Амалдаги қоидалар 2009 йилда кучга кирган. Ҳужжатдаги асосий ўзгартиришлардан бири битта ёки бир нечта операторларга вакиллик қилувчи дилерлар ҳуқуқ ва мажбуриятларига бағишланган алоҳида бўлимнинг пайдо бўлганидир.
Қоидалар лойиҳасида айтилишича, операторлар ўз сайтларида дилерлар рўйхатини тузиб, уларнинг манзил ва хизмат пунктларини кўрсатиши керак.
Ҳужжатда оператор томонидан алоҳида пулли хизматлар учун абонентдан уларнинг пулли эканлиги ҳақида огоҳлантирмасдан туриб маблағ ундирилиши кўрсатилмаган хизматлар учун пул ундиришга тенглаштирилиши кўзда тутилган.
Операторларга бепул ёки имтиёзли дақиқалар, SMS, интернет-трафик ва бошқа хизматлар тугагани ҳақида абонентларга SMS жўнатиш орқали хабардор қилиш мажбуриятини юклаш режалаштирилмоқда.
Изоҳ (0)