Масжиддаги ўғрилик: Таҳоратхонадан кузатув камерасини юлиб кетган йигитга масжидга қайтиб бориш тавсия қилинди

Ўзбекистондаги масжидлардан бирининг таҳоратхонасидан кузатув камераси ўғирлаб кетилди. Facebook’даги «Водители Ташкента (Drivers.uz)» гуруҳида қолдирилган видеохабарга кўра, ҳодиса 1 июль куни юз берган.

Воқеа айнан қайси масжидда юз берганига аниқлик киритилмаган. Видеода бир йигит таҳоратхонага кириб келгани, сўнг камера ўнг томонга сурила бошланганини кўриш мумкин. Томошабин охир-оқибат камера жойидан суғуриб олинаётганини тушуниб етади ва жараён давомида таҳоратхонага кириб келган ўша йигитнинг сиймоси кўринади.

«Водители Ташкента (Drivers.uz)» гуруҳи аъзолари мазкур ҳолатни кескин қоралаган, баъзи фойдаланувчилар унга инсоф тилаган. «Бир яхши оиланинг фарзандига ўхшайсан, лекин қилган ишинг нафақат сенга, балки ота-онангга ҳам иснод. Ақлу ҳушингни йиғиб, олган нарсангни масжидга олиб бориб бер ва кечирим сўра», — деб фойдаланувчилардан бири видеодаги гумонланувчига мурожаат қилган.

Бир қатор фойдаланувчилар масжидларда ўғрилик ҳолатлари учраётганини афсус билан тилга олган. «Ўтган йили одамлар таҳорат олаётганда бир киши уларнинг чўнтагидаги нарсаларни йиғиштириб кетаётгани тасвирланган видео тарқалган эди. Танишимнинг телефонини ҳам шундай қилиб ўғирлаб кетишган», — деб ёзган гуруҳ аъзоларидан бири.

«Ўтган йили Кўкча масжидида намоз вақти хонанинг охирида турган телефон, фотокамера ва пул тўла ҳамённи ўғирлаб кетилган эди... Бундай кишиларни ўғри деб эълон қилишдан осони йўқ, лекин бундан жамиятга фойда йўқ. Аксинча, уларни тўғри йўлга чақириш керак, шунда, балки, ўғрилар сони биттага камаяр», — деб фикр билдирган фойдаланувчилардан бири.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.