Тошкент метросининг «Чилонзор» йўналишида ҳам вагонлари сони учта бўлган ҳаракатланувчи таркиблар қатнай бошлади. Аввалроқ метрополитеннинг «Ўзбекистон» ва «Юнусобод» йўналишларида учта вагонли поездлар ҳаракатланаётгани ҳақида хабар берилган эди.
«Чилонзор» йўналишида, учта вагонли таркиблар билан бирга, вагонлари сони аввалгидек тўртта бўлган поездлар ҳам қатнамоқда. Тошкент метрополитенидаги манбанинг «Дарё»га маълум қилишича, ёз мавсумида йўловчилар сони камайгани ва электр-энергия сарфини тежам мақсадида, синов тариқасида вагонлар сони қисқартирилган.
Қайд этиш жоиз, бир муддат аввал «Ўзбекистон» йўналиши учун таъмирдан чиқарилиб, тайёрланаётгани айтилган янги ҳаракатланувчи таркиб «Чилонзор» йўналишида ҳам йўловчиларга хизмат кўрсатмоқда.
Маълумот учун, уч йўналиш («Чилонзор», «Ўзбекистон» ва «Юнусобод») ва 29 бекатдан иборат Тошкент метрополитенидан ҳар куни 200 мингга яқин йўловчи фойдаланади. 2015 йил июлида метрополитендаги барча ҳаракатланувчи таркиблар янгиланиши ҳақида хабар берилган эди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)