Жаҳон Чемпионатига ҳозирлик кўраётган Ўзбекистон миллий терма жамоаси «Олмалиқ» клубига имкониятни бой берди

Футзал бўйича Ўзбекистон терма жамоаси мамлакатнинг амалдаги чемпиони «Олмалиқ» клубига қарши ўртоқлик ўйинида майдонга тушиб, 4:8 ҳисобида енгилди.

Ўзбекистон футзал терма жамоаси шу йилнинг 10 сентябрь куни старт оладиган Жаҳон Чемпионатида Португалия, Панама ва мезбон Колумбия билан бир гуруҳдан жой олган. «Олмалиқ» клуби эса 15 июль санасидан бошланадиган Банкокдаги клублар ўртасидаги Осиё Чемпионатида Ўзбекистон шарафини ҳимоя қилади.

Ўзбекистон Футзал Ассоциацияси хабарига кўра, «Олмалиқ»га қарши ўйинда Ўзбекистон миллий терма жамоасига Шуҳрат Тожибоев, Хуршид Умаралиев, Константин Свиридов, Андрей Шлема каби етакчи футболчилар жароҳат сабаб ёрдам бера олмаган.

Мундиалга ҳозирлик кўраётган Ўзбекистон терма жамоаси 12, 13 ва 14 июль кунлари Тошкентда Тожикистон термасига қарши 3 та ўртоқлик ўйинида иштирок этади.