Дакка ҳуқуқ-тартибот идоралари Бангладеш пойтахтида 1 июль, жума куни содир этилган терактда иштирок этганлиги тахмин қилинаётган икки шахсни ҳибсга олди. Бу ҳақда миллий полиция раҳбари Шоҳидул Хокий маълум қилди, дея хабар беради «ТАСС».
«Улар айни пайтда касалхонада, кейинчалик сўроқ қиламиз. Жиноий иш очилган, бироқ тергов манфаатларини кўзлаб, уларнинг шахси ошкор этилмади. Ҳибсга олинганларнинг биринчиси терактга алоқадорлигига деярли шубҳа йўқ, чунки у махсус бўлинма томонидан гаровдагиларни озод этиш бўйича операция чоғида қўлга олинди. Иккинчиси эса шанба куни эрталаб ҳодиса жойи яқинида, операциянинг қизғин палласида ушланди. У бошдан-оёқ қонга беланган ва ўта шубҳали аҳволда эди», — дея таъкидлади Хокий.
Полиция раҳбарига кўра, операциядан сўнг махсус бўлинма текширувлар бўлимига 27 киши, жумладан, 13 нафар қутқарилган гаровдагиларни етказди. Улардан айримлари дарров қўйиб юборилди, аммо Бангладеш фуқароси бўлган икки шахс ҳозир ҳам полиция ихтиёрида қолмоқда.
Изоҳ (0)