Испаниянинг «Реал» футбол клуби ноқунуний равишда ер савдо-сотиғини амалга оширгани учун Мадрид ғазнасига 18,2 миллион евро қайтариши керак. Бу ҳақда, The Financial Times нашрига таяниб, «ТАСС» хабар бермоқда.
1998 йили «Реал» собиқ машғулотлар мажмуасининг бир қисмини шаҳар ихтиёрига топширди ва Мадриднинг бошқа туманларида, шу жумладан, клубнинг уй стадиони «Сантьяго Бернабеу» яқинида ер олди. Ўша пайтда ер нархи 488 минг еврони ташкил этарди. 2011 йилда ушбу ерлар «жамоат макони» деб тан олинганидан сўнг «Реал» ерларни қайтариши ва сотиб юбормаслиги керак эди. Натижада маҳаллий ҳукумат ерларни қайтариш учун 22,7 миллион евро тўлади.
Қайд этилишича, Европа Иттифоқи мазкур келишувни нотўғри деб топиб, ерларни 12,2 миллион еврога баҳолади ва ноқонуний даромад топгани учун «Реал»ни шаҳар бюджетига 18,2 миллион евро тўлашга мажбурлади.
Испания клубларининг давлат томонидан ноқонуний ёрдам олиш юзасидан интизомий ишлар 2013 йили очилди. «Реал»дан ташқари «Барселона», «Осасуна», «Атлетик», «Валенсия», «Эльче» ва «Эркулес» жамоалари ҳам бу ишларга алоқадорлиги маълум қилинди.
Изоҳ (0)