Тошкентда 21 июнь, сешанба куни Шанхай ҳамкорлик ташкилоти (ШҲТ)га аъзо мамлакатлар маданият вазирлари йиғилиши қатнашчилари шарафига Ўзбекистон санъат усталари ва ёш ижрочилари томонидан концерт дастури тақдим этилди.
Журналист Феруз Муҳаммаднинг маълум қилишича, концертни Бобомурод Худойқулов дирижёрлигидаги Алишер Навоий номли симфоник оркестр очиб берди. Шундан сўнг Ўзбекистон халқ артисти Муножот Йўлчиев «Оҳ, ким раҳим айламас» қўшиғини, «Ниҳол» мукофоти совриндори Илёс Арабов эса Навоийнинг «Қоматинг» ғазалига ишланган таронани маҳорат билан ижро этди.
«Ором», «Томоша», «Булбулча» рақс ансамблларининг жажжи болалари «Хуш келибсиз!» деб номланган мусиқий композиция билан чиқиш қилди. «Ниҳол» мукофоти совриндори Малика Эгамбердиеванинг «Туморим», Ўзбекистонда хизмат кўрсатган артист Юлдуз Турдиеванинг «Муҳаббат» номли қўшиқлари йиғилганларга жуда манзур бўлди.
Ўзбекистон халқ артисти Гулсанам Мамазоитова томонидан куйланган «Муҳаббатим» деб номланган тарона ва бу тарона учун махсус тайёрланиб, Дурдона Деҳқонова томонидан ижро этилган рақс бир-бирини тўлдириб, ажойиб мусиқий композиция ҳосил қила олди.
Ўзбекистонда хизмат кўрсатган артист Тўлқин Жабборов куйлаган «Менга бир боқ» деб номланган қўшиқ ва «Гавҳар» рақс ансамблининг хоразмча рақси дастур меҳмонларининг кўнглига янада кўтаринкилик олиб кирди.
«Ўзбекистон халқ артисти Озодбек Назарбеков томонидан куйланган ‘Шукрона’ таронаси дастурга алоҳида файз олиб кирди. Ўзбекистон халқ артистлари Оздбек Назарбеков ҳамда Гулсанам Мамазоитова биргаликда куйлаган ‘Нурга ўрайман’ таронаси дастурга якун ясади.
Маълумот учун, 22 июнь, чоршанба куни Тошкентда ШҲТга аъзо мамлакатлар маданият вазирларининг ўн учинчи йиғилиши бўлиб ўтди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)