Ўзбекистонда аввалги йилларда ўқишга кира олмаган абитуриентларнинг ҳужжат топшириши пуллик бўлгани ҳақидаги миш-мишлар рад этилди

Ўзбекистонда аввалги йилларда ўқишга кира олмаганлар учун ҳужжат топшириш пуллик бўлгани ҳақидаги хабарлар мутлақо асоссиз. Бу ҳақда ҳуқуқшунос Хушнудбек Худойбердиев Facebook’даги «Maslahat.uz» гуруҳида хабар қолдирган.

«Аввалги йилларда кира олмаганлар учун ҳужжат топшириш пуллик бўлгани, бунинг учун 150 минг сўм тўланиши кераклиги ҳақидаги хабарлар мутлақо асоссиз. Ҳужжат топшириш — бепул! Фирибгарларга ишониб, пул бериб кўрманг!», — дейилади гуруҳдаги хабарда.

Бундан ташқари, тест имтиҳонлари 20 июлга кўчирилгани ҳақидаги миш-мишлар ҳам рад этилган. «Тест имтиҳонлари ҳар йилгидек 1 августда бўлади. Имтиҳон санаси ўзгариши ҳақида ҳозирча ҳеч қандай расмий хабар берилгани йўқ», — дея қўшимча қилинади хабарда.

Маълумот учун, 20 июндан Ўзбекистон олий таълим муассасаларида абитуриентлардан ҳужжат қабул қилиш жараёни бошланган. Қабул комиссиялари 9:00 дан 18:00 гача ишлайди, ҳужжатларни қабул қилиш 20 июлгача давом этади.

2016—2017-ўқув йилида Ўзбекистон олий таълим муассасалари 57 907 нафар талабани бакалавриат учун қабул қилади. Уларнинг 19 120 нафари давлат грантлари асосида, 38 787 нафари эса тўлов-контракт асосида ўқишга қабул қилинади.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.