Toshkentda 21-iyun, seshanba kuni Shanxay hamkorlik tashkiloti (ShHT)ga a’zo mamlakatlar madaniyat vazirlari yig‘ilishi qatnashchilari sharafiga O‘zbekiston san’at ustalari va yosh ijrochilari tomonidan konsert dasturi taqdim etildi.
Jurnalist Feruz Muhammadning ma’lum qilishicha, konsertni Bobomurod Xudoyqulov dirijyorligidagi Alisher Navoiy nomli simfonik orkestr ochib berdi. Shundan so‘ng O‘zbekiston xalq artisti Munojot Yo‘lchiyev “Oh, kim rahim aylamas” qo‘shig‘ini, “Nihol” mukofoti sovrindori Ilyos Arabov esa Navoiyning “Qomating” g‘azaliga ishlangan taronani mahorat bilan ijro etdi.
“Orom”, “Tomosha”, “Bulbulcha” raqs ansambllarining jajji bolalari “Xush kelibsiz!” deb nomlangan musiqiy kompozitsiya bilan chiqish qildi. “Nihol” mukofoti sovrindori Malika Egamberdiyevaning “Tumorim”, O‘zbekistonda xizmat ko‘rsatgan artist Yulduz Turdiyevaning “Muhabbat” nomli qo‘shiqlari yig‘ilganlarga juda manzur bo‘ldi.
O‘zbekiston xalq artisti Gulsanam Mamazoitova tomonidan kuylangan “Muhabbatim” deb nomlangan tarona va bu tarona uchun maxsus tayyorlanib, Durdona Dehqonova tomonidan ijro etilgan raqs bir-birini to‘ldirib, ajoyib musiqiy kompozitsiya hosil qila oldi.
O‘zbekistonda xizmat ko‘rsatgan artist To‘lqin Jabborov kuylagan “Menga bir boq” deb nomlangan qo‘shiq va “Gavhar” raqs ansamblining xorazmcha raqsi dastur mehmonlarining ko‘ngliga yanada ko‘tarinkilik olib kirdi.
“O‘zbekiston xalq artisti Ozodbek Nazarbekov tomonidan kuylangan ‘Shukrona’ taronasi dasturga alohida fayz olib kirdi. O‘zbekiston xalq artistlari Ozdbek Nazarbekov hamda Gulsanam Mamazoitova birgalikda kuylagan ‘Nurga o‘rayman’ taronasi dasturga yakun yasadi.
Ma’lumot uchun, 22-iyun, chorshanba kuni Toshkentda ShHTga a’zo mamlakatlar madaniyat vazirlarining o‘n uchinchi yig‘ilishi bo‘lib o‘tdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)