Хакерлар турли тармоқ ресурсларида заифликларни қидириш учун нисбатан арзон восита ҳисобланади. Бу ҳақда АҚШ мудофаа вазири Эштон Картер маълум қилди, деб ёзади N+1.
Унинг сўзларига қараганда, иштирокчиларга тармоқ ресурсларини бузиб киришга уриниш вазифаси қўйиладиган танловлар ўтказиш ҳарбийларга тижорий мутахассисларни таклиф қилгандан кўра анча арзонга тушади.
Жорий йилнинг майида «Пентагонга бузиб кир» танлови якунланди, уни ўтказишга ҳарбийлар 150 минг доллар сарфлади. Маблағнинг ярми ғолибларга мукофот пулини тўлашга кетди.
«Бу кичик сумма эмас, лекин биз одатдагидек стандарт йўлдан бориб, хавфсизликни баҳолаш ва заифликларни топиш учун фирмани чақирганимизда, бу бизга бир миллион доллардан зиёдга тушарди», — деди Картер.
Изоҳ (0)