Айрим интернет-нашрларнинг Ўзбекистон пойтахтида 23—24 июнь кунлари Шанхай ҳамкорлик ташкилоти саммити ўтказилиши муносабати билан Тошкент «ёпилиши» ҳақидаги хабарлари энг кўп муҳокама этилаётган мавзулар қаторидан ўрин олди. Жумладан, баъзи сайтларда 16 июндан бошлаб автомобиль ва темир йўл транспортининг барча турлари, шунингдек, айрим авиаташувчилар учун шаҳарга кириш «ёпилиши» маълум қилинди. Бу ҳақда «Газета.uz» хабар бермоқда.
Ҳуқуқ-тартибот идораларидаги «Газета.uz» манбалари хавфсизликни таъминлаш учун кўрилаётган чораларни бундай даражадаги тадбирлар учун одатий ҳол сифатида баҳолади. Жумладан, шаҳар чегарасида ўтказиш тартибининг кучайтирилиши ва минтақалар билан автобус қатновининг чекланиши ҳар йили Мустақиллик байрами арафасида кузатилади. Четда бўлган ва уйларига қайтаётган шаҳарликлар ҳеч қандай муаммоларсиз, гарчи одатдагидан бироз синчиклаб текширишдан сўнг бўлса ҳам, пойтахтга келиб тушишлари мумкин. Шаҳар «ёпилиши» ундан чиқиш ва унга киришнинг тўлиқ тўхтатилишини англатмайди.
«Ўзбекистон ҳаво йўллари» миллий авиакомпанияси матбуот хизмати юқорида кўрсатиб ўтилган саналарга тўғри келадиган авиарейслар бекор қилинмагани, чипталар сотуви давом этаётганини, жадвалда ўзгаришлар юз бергудек бўлса, авиакомпания расмий сайтида жойлаштирилиши билдирилди. «Ўзбекистон темир йўллари» акциядорлик жамиятида ҳам ШҲТ саммити кунлари темир йўл қатнови чекланиши ҳақида маълумотга эга эмасликлари маълум қилинди.
Шуни таъкидлаш жоизки, Тошкентга юқори мартабали шахслар ташриф буюрганда ёки кузатилганда авиа ва темир йўл рейсларида тўхталишлар бўлади, бироқ улар доим қисқа муддатга чўзилади, холос.
Изоҳ (0)